เอวัมเม สุตัง. เอกัง สะมะยัง ภะคะวา สาวัตถิยัง วิหะระติ เชตะวะเน อะนาถะปิณฑิกัสสะ อาราเม. ตัต๎ระ โข ภะคะวา ภิกขู อามันเตสิ ภิกขะโวติ. ภะทันเตติ เต ภิกขู ภะคะวะโต ปัจจัสโสสุง. ภะคะวา เอตะทะโวจะ สะนาถา ภิกขะเว วิหะระถะ มา อะนาถา, ทุกขัง ภิกขะเว อะนาโถ วิหะระติ. ทะสะยิเม ภิกขะเว นาถะกะระณา ธัมมา. กะตะเม ทะสะ.

Evamme sutaṃ. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi bhikkhavoti. Bhadanteti te bhikkhū bhagavato paccassosuṃ. Bhagavā etadavoca sanāthā bhikkhave viharatha mā anāthā, dukkhaṃ bhikkhave anātho viharati. Dasayime bhikkhave nāthakaraṇā dhammā. Katame dasa.

Thus have I heard. At one time the Blessed One was staying near Sāvatthī, in Jeta's Grove, Anāthapiṇḍika's park. There the Blessed One addressed the monks: 'Monks.' 'Venerable sir,' those monks replied. The Blessed One said this: 'Monks, dwell as those who have a refuge, not as those without one. One without a refuge, monks, dwells in suffering. There are these ten refuge-making qualities, monks. Which ten?'

อิธะ ภิกขะเว ภิกขุ สีละวา โหติ, ปาติโมกขะสังวะระสังวุโต วิหะระติ, อาจาระโคจะระสัมปันโน, อะณุมัตเตสุ วัชเชสุ ภะยะทัสสาวี สะมาทายะ สิกขะติ สิกขาปะเทสุ. ยัมปิ ภิกขะเว ภิกขุ สีละวา โหติ ปาติโมกขะสังวะระสังวุโต วิหะระติ อาจาระโคจะระสัมปันโน, อะณุมัตเตสุ วัชเชสุ ภะยะทัสสาวี สะมาทายะ สิกขะติ สิกขาปะเทสุ, อะยัมปิ ธัมโม นาถะกะระโณ.

Idha bhikkhave bhikkhu sīlavā hoti, pātimokkhasaṃvarasaṃvuto viharati, ācāragocarasampanno, aṇumattesu vajjesu bhayadassāvī samādāya sikkhati sikkhāpadesu. Yampi bhikkhave bhikkhu sīlavā hoti pātimokkhasaṃvarasaṃvuto viharati ācāragocarasampanno, aṇumattesu vajjesu bhayadassāvī samādāya sikkhati sikkhāpadesu, ayampi dhammo nāthakaraṇo.

Here, monks, a monk is virtuous; he dwells restrained by the restraint of the Pātimokkha, perfect in conduct and resort, seeing danger in the slightest fault, and trains in the training rules he has undertaken. That a monk is virtuous in this way — this too is a refuge-making quality.

ปุนะ จะปะรัง ภิกขะเว ภิกขุ พะหุสสุโต โหติ, สุตะธะโร สุตะสันนิจจะโย, เย เต ธัมมา อาทิกัล๎ยาณา มัชเฌกัล๎ยาณา ปะริโยสานะกัล๎ยาณา สาตัถัง สะพ๎ยัญชะนัง เกวะละปะริปุณณัง ปะริสุทธัง พ๎รัห๎มะจะริยัง อะภิวะทันติ, ตะถารูปัสสะ ธัมมา พะหุสสุตา โหนติ, ธะตา วะจะสา ปะริจิตา มะนะสานุเปกขิตา ทิฏฐิยา สุปะฏิวิทธา, ยัมปิ ภิกขะเว ภิกขุ พะหุสสุโต โหติ, สุตะธะโร สุตะสันนิจจะโย, เย เต ธัมมา อาทิกัล๎ยาณา มัชเฌกัล๎ยาณา ปะริโยสานะกัล๎ยาณา, สาตัถัง สะพ๎ยัญชะนัง เกวะละปะริปุณณัง ปะริสุทธัง พ๎รัห๎มะจะริยัง อะภิวะทันติ, ตะถารูปัสสะ ธัมมา พะหุสสุตา โหนติ, ธะตา วะจะสา ปะริจิตา มะนะสานุเปกขิตา ทิฏฐิยา สุปะฏิวิทธา, อะยัมปิ ธัมโม นาถะกะระโณ.

Puna caparaṃ bhikkhave bhikkhu bahussuto hoti, sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ abhivadanti, tathārūpassa dhammā bahussutā honti, dhatā vacasā paricitā manasānupekkhitā diṭṭhiyā suppaṭividdhā, yampi bhikkhave bhikkhu bahussuto hoti, sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā, sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ abhivadanti, tathārūpassa dhammā bahussutā honti, dhatā vacasā paricitā manasānupekkhitā diṭṭhiyā suppaṭividdhā, ayampi dhammo nāthakaraṇo.

And further, monks, a monk has learned much, retains what he has heard and stores it up; those teachings which are good in the beginning, good in the middle and good at the end, which proclaim with meaning and phrasing the wholly complete and purified holy life — such teachings he has learned much of, retained, recited aloud, pondered in mind and penetrated well by view. That a monk is learned in this way — this too is a refuge-making quality.

ปุนะ จะปะรัง ภิกขะเว ภิกขุ กัล๎ยาณะมิตโต โหติ, กัล๎ยาณะสะหาโย กัล๎ยาณะสัมปะวังโก, ยัมปิ ภิกขะเว ภิกขุ กัล๎ยาณะมิตโต โหติ, กัล๎ยาณะสะหาโย กัล๎ยาณะสัมปะวังโก, อะยัมปิ ธัมโม นาถะกะระโณ,

Puna caparaṃ bhikkhave bhikkhu kalyāṇamitto hoti, kalyāṇasahāyo kalyāṇasampavaṅko, yampi bhikkhave bhikkhu kalyāṇamitto hoti, kalyāṇasahāyo kalyāṇasampavaṅko, ayampi dhammo nāthakaraṇo,

And further, monks, a monk has good friends, good companions, good associates. That a monk has good friends in this way — this too is a refuge-making quality,

ปุนะ จะปะรัง ภิกขะเว ภิกขุ สุวะโจ โหติ, โสวะจัสสะกะระเณหิ ธัมเมหิ สะมันนาคะโต, ขะโม ปะทักขิณัคคาหี อะนุสาสะนิง, ยัมปิ ภิกขะเว ภิกขุ สุวะโจ โหติ, โสวะจัสสะกะระเณหิ ธัมเมหิ สะมันนาคะโต. ขะโม ปะทักขิณัคคาหี อะนุสาสะนิง, อะยัมปิ ธัมโม นาถะกะระโณ.

Puna caparaṃ bhikkhave bhikkhu suvaco hoti, sovacassakaraṇehi dhammehi samannāgato, khamo padakkhiṇaggāhī anusāsaniṃ, yampi bhikkhave bhikkhu suvaco hoti, sovacassakaraṇehi dhammehi samannāgato. Khamo padakkhiṇaggāhī anusāsaniṃ, ayampi dhammo nāthakaraṇo.

And further, monks, a monk is easy to speak to, endowed with qualities that make him easy to admonish, patient, and taking instruction respectfully. That a monk is easy to speak to in this way — this too is a refuge-making quality.

ปุนะ จะปะรัง ภิกขะเว ภิกขุ, ยานิ ตานิ สะพ๎รัห๎มะจารีนัง อุจจาวะจานิ กิงกะระณียานิ, ตัตถะ ทักโข โหติ อะนะละโส, ตัต๎รุปายายะ วิมังสายะ สะมันนาคะโต, อะลัง กาตุง อะลัง สังวิธาตุง. ยัมปิ ภิกขะเว ภิกขุ, ยานิ ตานิ สะพ๎รัห๎มะจารีนัง อุจจาวะจานิ กิงกะระณียานิ, ตัตถะ ทักโข โหติ อะนะละโส, ตัต๎รุปายายะ วิมังสายะ สะมันนาคะโต, อะลัง กาตุง อะลัง สังวิธาตุง, อะยัมปิ ธัมโม นาถะกะระโณ.

Puna caparaṃ bhikkhave bhikkhu, yāni tāni sabrahmacārīnaṃ uccāvacāni kiṃkaraṇīyāni, tattha dakkho hoti analaso, tatrupāyāya vīmaṃsāya samannāgato, alaṃ kātuṃ alaṃ saṃvidhātuṃ. Yampi bhikkhave bhikkhu, yāni tāni sabrahmacārīnaṃ uccāvacāni kiṃkaraṇīyāni, tattha dakkho hoti analaso, tatrupāyāya vīmaṃsāya samannāgato, alaṃ kātuṃ alaṃ saṃvidhātuṃ, ayampi dhammo nāthakaraṇo.

And further, monks, in whatever duties there are for his fellows in the holy life, high or low, a monk is deft and unlazy, possessed of the judgement needed for them, able to do them and able to arrange them. That a monk is capable in this way — this too is a refuge-making quality.

ปุนะ จะปะรัง ภิกขะเว ภิกขุ ธัมมะกาโม โหต, ปิยะสะมุทาหาโร, อะภิธัมเม อะภิวินะเย อุฬารัปปามุชโช. ยัมปิ ภิกขะเว ภิกขุ ธัมมะกาโม โหติ, ปิยะสะมุทาหาโร, อะภิธัมเม อะภิวินะเย อุฬารัปปามุชโช. อะยัมปิ ธัมโม นาถะกะระโณ.

Puna caparaṃ bhikkhave bhikkhu dhammakāmo hoti, piyasamudāhāro, abhidhamme abhivinaye uḷārappāmujjo. Yampi bhikkhave bhikkhu dhammakāmo hoti, piyasamudāhāro, abhidhamme abhivinaye uḷārappāmujjo. Ayampi dhammo nāthakaraṇo.

And further, monks, a monk loves the Dhamma, is delightful to talk with, and has great gladness in the higher Dhamma and the higher discipline. That a monk loves the Dhamma in this way — this too is a refuge-making quality.

ปุนะ จะปะรัง ภิกขะเว ภิกขุ อารัทธะวิริโย วิหะระติ, อะกุสะลานัง ธัมมานัง ปะหานายะ, กุสะลานัง ธัมมานัง อุปะสัมปะทายะ, ถามะวา ทัฬ๎หะปะรักกะโม อะนิกขิตตะธุโร กุสะเลสุ ธัมเมสุ. ยัมปิ ภิกขะเว ภิกขุ อารัทธะวิริโย วิหะระติ, อะกุสะลานัง ธัมมานัง ปะหานายะ, กุสะลานัง ธัมมานัง อุปะสัมปะทายะ, ถามะวา ทัฬหะปะรักกะโม อะนิกขิตตะธุโร กุสะเลสุ ธัมเมสุ. อะยัมปิ ธัมโม นาถะกะระโณ.

Puna caparaṃ bhikkhave bhikkhu āraddhavīriyo viharati, akusalānaṃ dhammānaṃ pahānāya, kusalānaṃ dhammānaṃ upasampadāya, thāmavā daḷhaparakkamo anikkhittadhuro kusalesu dhammesu. Yampi bhikkhave bhikkhu āraddhavīriyo viharati, akusalānaṃ dhammānaṃ pahānāya, kusalānaṃ dhammānaṃ upasampadāya, thāmavā daḷhaparakkamo anikkhittadhuro kusalesu dhammesu. Ayampi dhammo nāthakaraṇo.

And further, monks, a monk dwells with energy aroused for abandoning unwholesome states and acquiring wholesome ones — steadfast, firm in exertion, not laying down the burden with regard to wholesome states. That a monk is energetic in this way — this too is a refuge-making quality.

ปุนะ จะปะรัง ภิกขะเว ภิกขุ สันตุฏโฐ โหติ, อิตะริตะระจีวะระปิณฑะปาตะเสนาสะนะคิลานะปัจจะยะเภสัชชะปะริกขาเรนะ. ยัมปิ ภิกขะเว ภิกขุ สันตุฏโฐ โหติ, อิตะริตะระจีวะระปิณฑะปาตะเสนาสะนะคิลานะปัจจะยะเภสัชชะปะริกขาเรนะ. อะยัมปิ ธัมโม นาถะกะระโณ.

Puna caparaṃ bhikkhave bhikkhu santuṭṭho hoti, itarītaracīvarapiṇḍapātasenāsanagilānapaccayabhesajjaparikkhārena. Yampi bhikkhave bhikkhu santuṭṭho hoti, itarītaracīvarapiṇḍapātasenāsanagilānapaccayabhesajjaparikkhārena. Ayampi dhammo nāthakaraṇo.

And further, monks, a monk is content with whatever robes, almsfood, lodging and medicinal requisites for the sick he receives. That a monk is content in this way — this too is a refuge-making quality.

ปุนะ จะปะรัง ภิกขะเว ภิกขุ สะติมา โหติ, ปะระเมนะ สะติเนปักเกนะ สะมันนาคะโต, จิระกะตัมปิ จิระภาสิตัมปิ สะริตา อะนุสสะริตา, ยัมปิ ภิกขะเว ภิกขุ สะติมา โหติ, ปะระเมนะ สะติเนปักเกนะ สะมันนาคะโต, จิระกะตัมปิ จิระภาสิตัมปิ สะริตา อะนุสสะริตา, อะยัมปิ ธัมโม นาถะกะระโณ.

Puna caparaṃ bhikkhave bhikkhu satimā hoti, paramena satinepakkena samannāgato, cirakatampi cirabhāsitampi saritā anussaritā, yampi bhikkhave bhikkhu satimā hoti, paramena satinepakkena samannāgato, cirakatampi cirabhāsitampi saritā anussaritā, ayampi dhammo nāthakaraṇo.

And further, monks, a monk is mindful, possessed of the highest mindfulness and discretion, one who remembers and recollects what was done and said long ago. That a monk is mindful in this way — this too is a refuge-making quality.

ปุนะ จะปะรัง ภิกขะเว ภิกขุ ปัญญะวา โหติ, อุทะยัตถะคามินิยา ปัญญายะ สะมันนาคะโต, อะริยายะ นิพเพธิกายะ สัมมาทุกขักขะยะคามินิยา, ยัมปิ ภิกขะเว ภิกขุ ปัญญะวา โหติ, อุทะยัตถะคามินิยา ปัญญายะ สะมันนาคะโต, อะริยายะ นิพเพธิกายะ สัมมาทุกขักขะยะคามินิยา, อะยัมปิ ธัมโม นาถะกะระโณ.

Puna caparaṃ bhikkhave bhikkhu paññavā hoti, udayatthagāminiyā paññāya samannāgato, ariyāya nibbedhikāya sammādukkhakkhayagāminiyā, yampi bhikkhave bhikkhu paññavā hoti, udayatthagāminiyā paññāya samannāgato, ariyāya nibbedhikāya sammādukkhakkhayagāminiyā, ayampi dhammo nāthakaraṇo.

And further, monks, a monk is wise, possessed of the wisdom that sees rise and fall — noble, penetrating, leading to the complete destruction of suffering. That a monk is wise in this way — this too is a refuge-making quality.

สะนาถา ภิกขะเว วิหะระถะ มา อะนาถา, ทุกขัง ภิกขะเว อะนาโถ วิหะระติ, อิเม โข ภิกขะเว ทะสะ นาถะกะระณา ธัมมาติ.

Sanāthā bhikkhave viharatha mā anāthā, dukkhaṃ bhikkhave anātho viharati, ime kho bhikkhave dasa nāthakaraṇā dhammāti.

Dwell as those who have a refuge, monks, not as those without one. One without a refuge, monks, dwells in suffering. These, monks, are the ten refuge-making qualities.

อิทะมะโวจะ ภะคะวา. อัตตะมะนา เต ภิกขู ภะคะวะโต ภาสิตัง อะภินันทุนติ.

Idamavoca bhagavā. Attamanā te bhikkhū bhagavato bhāsitaṃ abhinanduntī.

This is what the Blessed One said. Gladdened, those monks delighted in the Blessed One's words.